Beste Alumni Dit is Oktober, en om Leipoldt se woorde te eggo: “… die mooiste, mooiste maand!” Sedert ons laaste nuusbrief het Moeder Natuur haar grou wintersbaadjie verruil vir ʼn helderkleurige blommekleed en wink nóg ʼn kenmerkende Afrika-somer vir elkeen van ons. Groei, soos wat oral rondom ons te bespeur is, is ook kenmerkend van Akademia se alumni-gemeenskap. Dié groei spreek tot die alumni-komitee se kernstrewe om elke alumnus te begeester om trots sy/haar Fontieteit (identiteit as Akademia-student) uit te leef. En meer nog: om sy/haar plek roepingsgedrewe in te neem binne die intergenerasionele verbondsverhouding waarbinne Akademia as ʼn klassieke gemeenskapsinstelling voortbestaan. Die onlangse onthulling van die Akademia-syserp, ʼn trotse samewerkingsinisiatief tussen die komitee en die instelling, vergestalt dié verbondsverhouding op ʼn stylvolle en tasbare wyse. Nie nét vertel hierdie handelsmerkproduk die storie van die vestiging en uitbouing van ons geliefde alma mater nie, dit bied ook aan alumni die geleentheid om ʼn bydra te lewer tot die 2028- wêreldklas kampus in die ooste van Pretoria. ʼn Gedeelte van die serp se aankoopprys sal aan die instelling se skenkingsfonds geskenk word. Hou gerus Akademia se sosialemediaplatforms dop vir meer inligting oor die serp wat binnekort op Die Winkel se aanlyn platform of die inloopwinkel op die Leriba-kampus beskikbaar sal wees. Die ontwikkeling van diesulke produkte maak deel uit van die komitee se droom, om vir alumni unieke en betekenisvolle maniere te skep om hul verbondenheid en gepaardgaande tuiskoms aan Akademia te vier. Hierdie gebeurlikhede en handelsmerkprodukte verteenwoordig ervarings en kleinode wat nie net bloot aangekoop en meegemaak kan word nie. Nee. Dit spreek tot ʼn grootse voorreg waarvoor elke alumnus hard gewerk het en deur passie, deursettingsvermoë en persoonlike opofferings verwerf het. In die voltooiing van jou studie gee jy baie van jouself vir Akademia, maar die opbrengs van hierdie belegging is nóg groter. Jy word deel van ʼn dinamiese netwerk, ʼn lewenslange gebondenheid en kom tuis in ʼn geborge gemeenskap van eensgesindheid wat hoopvol na ʼn vrye toekoms streef. | 
