Ўзбекистонда демократия

Ўзбекистон интеллектуал мулк бўйича қора рўйхатдан чиқарилди

“ННТларнинг молиявий барқарорлиги” қўлланмаси ишлаб чиқилди

Ўзбекистонда коррупцияга қарши курашиш ташаббуси бошланди

“Юксалиш” ҳаракати ҳукуматни энергия тармоғи модернизацияси харажатларини очиқлашга чақирди

“Юксалиш” ҳаракати раиси Бобур Бекмуродов энергия тарифларини либераллаштириш бошланиши билан бир қаторда мавжуд муаммоларни ҳал этиш зарурлигини таъкидлади.

Унинг фикрича, Ўзбекистон энергетика саноати туб ислоҳотларга муҳтож, шунинг учун тарифларни ўзгартириш ва бозор механизмларини жорий этиш зарур.

“Таъкидлаш керак, Ўзбекистонда электр энергияси истеъмолига тўловлар унинг таннархига мос келмайди, орадаги тафовут давлат бюджетидан субсидиялар ҳисобига қопланади. Бундай ёндашув фуқароларнинг моддий имкониятидан қатъи назар, бутун аҳоли учун қўлланилади”, - дея таъкидлади Ҳаракат раиси.

Ислоҳотлар билан бирга, масъул вазирлик ва идоралар қуйидагиларни ҳам инобатга олишга чақирилди:

➖Қарор ижроси доирасида марказий иситиш тизими ва табиий газдан фойдаланиш имкони йўқ ҳудудлардаги шароитларни ҳамда асосий иссиқлик манбалари печка ва кондиционерлар эканлигини ҳисобга олиш;

➖Энергетика вазирлиги юқори кучланиш бўлганда маиший техникаларига зарар етган истеъмолчиларга компенсация тўлаш механизмларини ишлаб чиқиш;

➖Ҳукумат давлат бюджетидан энергия тармоғини модернизация қилишга ажратилган маблағларнинг очиқлиги ва шаффофлигини таъминлаш.

Бобур Бекмуродовнинг қайд этишича, хорижий тажрибани ўрганиш ҳам муҳим. Бошқа мамлакатларда дифференцияланган тарифлар қўлланилади. Яъни, электр энергиясига талаб юқори бўлган пайтларда (аномал ҳаво шароитларида) тарифлар сезиларли даражада оширилади.

ЮНИСEФ: Ўзбекистонда иммунизация – инсоният ғалабаси тарихидир

ЮНИСEФнинг Ўзбекистондаги ваколатхонаси Бутунжаҳон эмлаш ҳафталиги доирасида мамлакат Соғлиқни сақлаш вазирлиги БМТнинг мазкур жамғармаси кўмагида ривожлантираётган болалар ва катталарни эмлаш муваффақиятлари ҳақида ахборот берди.

Ўзбекистонда ЮНИСEФнинг Gavi вакциналар альянси, Жаҳон соғлиқни сақлаш ташкилоти ва USAID билан ҳамкорликда кўрсатган техник ёрдами эмлаш хизматлари ва инфратузилмасини сезиларли даражада яхшилади, бу эса Миллий эмлаш дастури орқали 3,5 миллион болага ёрдам берди.

Бу ҳар йили 950 минг болага дифтерия, қоқшол ва кўкйўталга қарши уч дозали вакцина олиш имконини берувчи хавфсиз вакциналарнинг барқарор таъминланишини ўз ичига олади.

Бундан ташқари, ЮНИСEФ Ўзбекистонни иммунизация тизими ва таъминот занжирини мустаҳкамлаш учун фойдаланиладиган рақамли технологиялардан фойдаланишда қўллаб-қувватламоқда. ЮНИСEФ бошқа тизимлар билан мослигини таъминловчи Электрон эмлаш реестрини (ЭЭР) ишлаб чиқди ва жорий қилди.

“Ўзбекистондаги иммунизация тарихи инсоният ғалабаси тарихидир. Барча – оналар, патронаж ҳамширалар, мобил эмлаш бригадалари вакцинаторлари, вакциналар омбори менежерлари ва ҳайдовчилар, ҳақиқатан ҳам барчаси, инсоният қўлида эканлигини кўрсатади”, - деди ЮНИСEФнинг Ўзбекистондаги ваколатхонаси раҳбари ўринбосари Жоффри Ижумба.

Европа Иттифоқи Ўзбекистонда фуқаролик жамиятини ривожлантириш бўйича лойиҳаларни ишга туширди

3 апрель куни Европа Иттифоқининг Ўзбекистондаги делегацияси мамлакатда фуқаролик жамиятини ривожлантириш бўйича 2024-2026 йилларга мўлжалланган грант лойиҳаларини эълон қилди.

Фуқаролик жамияти, айниқса, аёллар ва ижтимоий ҳимояга муҳтож гуруҳларнинг имкониятларини кенгайтиришга қаратилган 8 та ташаббус Европа Иттифоқи томонидан 3,5 миллион евро миқдорида молиялаштирилди. Ушбу ташаббуслар қуйидагилардан иборат:

1) Тошкент, Самарқанд ва Наманган шаҳарларининг хотин-қизлар ва ёшлар билан ишловчи фуқаролик жамияти ташкилотлари фаолиятини ривожлантириш. Мақсад – танланган шаҳарлардаги фуқаролик жамияти ташкилотларининг аҳолининг ижтимоий ҳимояга муҳтож қатламлари билан ишлаш салоҳиятини ошириш. ОИВ билан яшовчилар, гиёҳвандларга (айниқса, аёллар ва ёшлар) нисбатан стигма ва дискриминацияни камайтириш.

2) Гендер зўравонлик қурбони бўлган қизлар ва аёлларни қўллаб-қувватлаш бўйича фуқаролик жамияти ташкилотлари учун методологияни тақдим этиш. Мақсад – гендер зўравонликни аниқлаш методологиясини жорий этиш, жабрланувчиларни қандай қўллаб-қувватлаш ва уларни тегишли хизматларга юбориш бўйича билимларни тарқатиш.

3) Фуқаролик жамияти ташкилотлари фаолиятини  кучайтириш ва уларни давлат органлари билан мувофиқлаштириш. Мақсад – фуқаролик жамияти ташкилотларини ўзаро, шунингдек, давлат билан мувофиқлаштириш.

4) Ўзбекистонда гендер тенглигини тарғиб қилиш ва ёш аёлларнинг имкониятларини кенгайтириш учун оммавий ахборот воситаларининг кўникмалари. Мақсад – аёллар ва ёшларнинг фаоллигини ошириш, бошқарув қарорларини қабул қилишда уларнинг иштирокини кенгайтириш, рақамли саводхонликни ошириш, айниқса, қизлар ўртасида гендер дезинформациясига қарши курашиш.

5) Фуқаролик иштироки орқали гендер трансформациясини рағбатлантириш. Мақсад – гендер ва аёллар ҳуқуқлари, уларнинг жамият ҳаётидаги фаол иштироки ва қарорлар қабул қилиш ҳақидаги билимлар билан етишмовчилигини тўлдириш.

6) Сув ресурсларини барқарор бошқаришда фуқаролик жамияти ташкилотларининг иштироки. Мақсад – сув танқислиги ҳақида хабардорликни ошириш.

7) “Яшил” ва айланма иқтисодиёт тармоқларида аёллар ва ёшларнинг иқтисодий имкониятларини кенгайтиришга кўмаклашиш. Мақсад – аёллар ва ёшларни агроўрмон хўжалиги ва айланма иқтисодиётдаги қиймат занжирларида иштирок этиш имкониятларини кенгайтириш ва заиф қатламдаги аёллар учун тадбиркорликни ривожлантириш, фаровонлигини ошириш ва ижтимоий инклюзивлик учун қулай муҳит яратиш.

8) Ўзбекистоннинг айрим ҳудудларида фуқаролик жамиятининг инсон ҳуқуқлари, аҳолининг ижтимоий ҳимояга муҳтож қатламлари ва атроф-муҳитни рағбатлантириш ва ҳимоя қилиш имкониятларини кенгайтириш. Мақсад – фуқаролик жамияти ташкилотларига аҳолининг ижтимоий ҳимояга муҳтож қатламлари ҳаётини ҳимоя қилиш ва яхшилашга ёрдам бериш, фуқаролик жамиятининг устувор масалалари бўйича сиёсатчилар ва жамоатчилик билан ҳамкорликни кенгайтириш.

Марказий Осиё давлатларининг ижтимоий тадбиркорлик бўйича тажрибаси кўриб чиқилди

ЎзЛиДеП депутатлари давлат идораларини тежамкорликка чақирди

Ўзбекистон Либерал-демократик партияси (ЎзЛиДеП) депутатлари Нодир Абдувалиев ва Сардор Ғиёсов қимматбаҳо машиналар харид қилинаётгани ҳақидаги хабарлар фонида давлат идораларини тежамкорликка чақирди.

2023 йил якунига кўра, мамлакатнинг жамланма бюджет тақчиллиги 59 триллион сўмни ёки ялпи ички маҳсулотга нисбатан 5,5 фоизни (даромадлар – 321 триллион сўм, харажатлар – 380 триллион сўм) ташкил этган.

“Бироқ жорий йилнинг биринчи чорагида бюджет тақчиллиги фонида айрим вазирликлар ва давлат ташкилотлари томонидан қимматбаҳо автомашиналар харид қилиш учун маблағ сарфланди, – дейди ЎзЛиДеП Қонунчилик палатасидаги фракцияси вакиллари.

Мисол тариқасида Бандлик ва камбағалликни қисқартириш вазирлиги ҳузуридаги Жамоат ишлари жамғармаси томонидан 444 миллион сўмга BYD Song Plus автомобили, ҳукумат ҳузуридаги Энергетика бозорини ривожлантириш ва тартибга солиш агентлиги томонидан 504 миллион сўмга премиум-классдаги BYD Han автомобили, Олий суд томонидан 1,5 миллиард сўмга Toyota Land Cruiser 300 йўлтанламаси харид қилингани келтирилади.

Депутатлар давлат идораларини тежамкорликка, агар фойдаланилаётган транспорт воситалари бўлса, бу мақсадлар учун сарф-харажатларга йўл қўймасликка чақирди.

Ўзбекистон ва Қирғизистон вакиллари маҳаллий бошқарув бўйича тажриба алмашди

25-26 апрель кунлари Бишкек шаҳрида “Марказий Осиёда маҳаллий ривожланишни бошқариш модели” мавзусида минтақавий семинар ташкил этилди.

Иштирокчилар маҳаллий бошқарувни ривожлантириш бўйича олган билимлари билан ўртоқлашишди ҳамда минтақа мамлакатларига хос бошқарув тизимлари, умумий тарих, анъана, маданиятлар билан боғлиқ тажрибаларни муҳокама қилишди.

Семинар якунида маҳаллий бошқарув соҳасида келгусида ҳамкорликда олиб бориладиган тадқиқотлар учун йўналишлар белгиланди, ислоҳотлар бўйича тавсиялар ишлаб чиқилди.

“Адолат” партияси: Истироҳат боғлари халқники бўлиши керак

Ўзбекистон “Адолат” социал-демократик партияси Тошкент ҳокимлиги томонидан Абдулла Қодирий номидаги ва “Дўстлик” (собиқ Бобур) боғлари 49 йил муддатга BMP Smart Decision Management  тизимига ўтказилгани муносабати билан баёнот билан чиқди.

Партиянинг таъкидлашича, "боғлар халққа тегишли бўлиши керак". Партия депутатларидан иборат ишчи гуруҳ истироҳат боғларида ўрганиш ишларини олиб бормоқда.

Партия истироҳат боғларини жамоатчилик муҳокамасидан сўнг ижарага бериш ва бу тартибни очиқ ва ошкора амалга ошириш зарур, деб ҳисоблайди. Бу жараёнда халқ депутатлари Кенгашининг ҳам фикрини олиш мақсадга мувофиқдир.

“Барча қурилиш ва реконструкция ишлари жамоатчилик фикрини инобатга олган ҳолда ташкил этилиши, доимий жамоатчилик назорати зарур ва, албатта, дарахтларга зарар етказилмаслиги керак”, — дейилади партия баёнотида.

Ўзбекистонда 2024 йилнинг биринчи чорагида судлар 4 477 нафар шахсни оилавий зўравонлик моддалари бўйича жавобгарликка тортди.

Маъмурий жавобгарлик тўғрисидаги кодекснинг 59−2-моддаси, яъни оилавий (маиший) зўравонлик бўйича 4 343 нафар шахс жиноий жавобгарликка, улардан 2 344 нафари жаримага тортилган, 1 999 нафарига эса маъмурий қамоқ жазоси тайинланган.

Такрор ёки оғирлаштирувчи ҳолатлар билан содир этилган оилавий (маиший) зўравонлик учун 134 нафар шахс Жиноят кодексининг 126−1-моддаси билан судланган, шундан 51 нафарига озодликдан маҳрум қилиш, 83 нафарига озодликдан маҳрум қилиш билан боғлиқ бўлмаган жазо тайинланган.

Бундан ташқари, ҳисобот даврида Ўзбекистонда 318 нафар шахс Маъмурий жавобгарлик тўғрисидаги кодекснинг 41−1-моддасига асосан жинсий зўравонлик содир этганлиги учун судланган бўлиб, улардан 97 нафари жаримага тортилган, 221 нафари эса маъмурий қамоққа олинган.

Ушбу модда кучга кирган 2023 йилнинг апрель ойидан буён ушбу модда бўйича судланганларнинг умумий сони 984 нафарга етди (2023 йилда 666 та).

Долзарб мавзулар

Ўзбекистонда 426 нафар шахс афв этилди

Президент Шавкат Мирзиёев 8 апрель куни Рамазон Ҳайити арафасида афв этиш тўғрисидаги навбатдаги фармонни имзолади.

Ҳужжат билан 426 нафар шахс афв этилди, улардан 135 нафари асосий жазони ўташдан тўлиқ озод этилди. Афв этилганлар орасида хорижий давлатларнинг 11 нафар фуқароси, 50 нафари аёллар, 13 нафари 60 ёшдан ошган эркаклар, 157 нафари 30 ёшга тўлмаган (шундан 3 нафари вояга етмаганлар), шунингдек, фаолияти тақиқланган ташкилотлар фаолиятида қатнашган 5 нафар шахсдир.

 “Ташаббусли бюджет” доирасида 2 770 та лойиҳа ғолиб бўлди

Ўзбекистонда 2024 йилнинг “Ташаббусли бюджет”нинг  биринчи мавсуми учун овоз бериш якунланди.

Мактаблар, йўллар ва бошқа объектларни таъмирлаш бўйича фуқаролар ташаббуслари учун 11,7 миллион овоз тўпланди. 2 254 та маҳалладаги 2 770 та лойиҳа ғолиб деб топилди.

Уларни амалга ошириш учун маҳаллий бюджетлардан 3,3 триллион сўм (1,31 триллион сўмдан) йўналтирилиши кўзда тутилган.

Британия ташқи ишлар вазири Ўзбекистонга келди

"Юксалиш" ҳаракати раиси Бобур Бекмуродов апрель ойида Тошкентга келган Буюк Британия ташқи ишлар вазири Девид Кемерон билан учрашди.

Норасмий учрашувда мамлакатдаги фуқаролик жамиятини ривожлантириш ва сиёсий эркинликларни таъминлаш истиқболлари ҳақида фикр алмашилди.

Душанбеда Ўзбекистон элчихонасининг янги биноси очилди

Ўзбекистон Президентининг апрель ойида Тожикистонга давлат ташрифи доирасида Душанбе шаҳрида мамлакат элчихонасининг янги биноси очилди.

Шавкат Мирзиёев ва Эмомали Раҳмон иштирокида Ўзбекистон дипломатик ваколатхонаси биносининг тантанали очилиш маросими бўлиб ўтди.

Элчихонада дипломатларнинг самарали ишлаши учун зарур шарт-шароитлар яратилган.

Озарбайжоннинг қадимий шаҳарларидан бири Ганжа шаҳрида Ўзбекистоннинг ушбу мамлакатдаги биринчи фахрий консуллиги очилди.

Консуллик Ўзбекистон фуқароларининг ҳуқуқ ва манфаатларини ҳимоя қилиш, иқтисодий ҳамкорликни ривожлантириш, Ўзбекистонга сармоя ва сайёҳларни жалб этишга кўмаклашади.

Ўзбекистоннинг Озарбайжондаги биринчи фахрий консули этиб Канан Жалилов тайинланди.

Янги ННТ рўйхатга олинди

1 апрель куни Ўзбекистон ногиронлар ассоциацияси кўмагида яна бир нодавлат нотижорат ташкилоти ташкил этилди.

“Тенг имкониятларга эга ногиронлар жамияти” нодавлат нотижорат ташкилоти адлия органларида давлат рўйхатидан ўтказилди.

Ташкилотнинг мақсадлари орасида ногиронлиги бўлган шахслар бошқа фуқаролар билан тенг равишда ижтимоий, иқтисодий, сиёсий ва маданий ҳуқуқлардан фойдаланишлари учун зарур шарт-шароитлар ва тенг имкониятлар яратишга кўмаклашиш киради.

Президент Матбуот хизмати медиалойиҳаларни қорақалпоқ тилида ҳам тайёрламоқда

Ўзбекистон Президенти иштирокида ҳафтанинг асосий воқеаларига бағишланган “Махсус ракурс” лойиҳаси эндиликда нафақат ўзбек ва рус тилларида, балки қорақалпоқ тилида ҳам эълон қилинмоқда.

Дастурни тайёрлаш учун Жўқорғи Кенгес ва Қорақалпоғистон Вазирлар Кенгаши кўмагида Нукус шаҳрида алоҳида гуруҳ тузилди. Келгусида қорақалпоқ тилидаги контентни янада кенгайтириш режалаштирилган.

Ўзбекистон Қозоғистонга тошқиндан жабр кўрган ҳудудлар аҳолиси учун гуманитар ёрдам жўнатди. 10 миллиард сўмлик 100 тонна юк жўнатилди.

Ёрдам озиқ-овқат, болалар ва катталар учун кийим-кечак, матраслар, кўрпа-тўшаклар, ёстиқлар, гигиена воситалари, махсус жиҳозлар билан жиҳозланган чодирлар, резина қайиқлар тўплами ва бошқа зарур товарларни ўз ичига олган.

Афғонистонга инсонпарварлик ёрдами

Афғонистоннинг Балх вилоятига Ўзбекистондан 169 тоннадан ортиқ инсонпарварлик ёрдами етказилди.

Юк таркибига 48 тонна ун, 48 тонна буғдой, 15 тонна ўсимлик ёғи, 10 мингдан ортиқ гўшт консерваси, 24 тонна шакар, 22 тонна макарон маҳсулотлари ва 100 минг ўрам ярим тайёр маҳсулотлар киритилган.

Ўзбекистоннинг доимий аҳолиси 37 миллиондан ошди

Ўзбекистоннинг доимий аҳолиси сони 2024 йил 22 апрелга ўтар кечаси 37 миллиондан ошди. Эркаклар 18,6 миллион кишини, аёллар аҳолиси эса 18,34 миллиондан ортиқ кишини ташкил қилади.

2023 йилда Ўзбекистон доимий аҳолиси сонининг ўсиши 774,9 минг кишини ёки 2,2 фоизни ташкил этди. 2020 йилдан буён бу кўрсаткич ҳар йили ортиб бормоқда.

Янги тайинловлар

Чилининг Ўзбекистондаги янги элчиси тайинланди

24 апрель куни Ўзбекистон Ташқи ишлар вазири Бахтиёр Саидов Чилининг янги тайинланган фавқулодда ва мухтор элчиси Эдуардо Эскобарни қабул қилди.

Учрашувда икки томонлама муносабатларни фаоллаштириш, ишбилармонлик алоқаларини мустаҳкамлаш ва ҳамкорликнинг янги форматларини, жумладан, парламентлараро мулоқот, қўшма савдо комиссиялари ва бошқа кўплаб йўналишларни йўлга қўйиш муҳимлиги таъкидланди.

Бунгача Чилининг Ўзбекистондаги элчиси лавозимини Хуан Эдуардо Эгигурен эгаллаб келган.

Кипрнинг Ўзбекистондаги янги элчиси тайинланди

24 апрель куни Ўзбекистон ташқи ишлар вазири Бахтиёр Саидов Кипрнинг Ўзбекистондаги янги элчиси Кипрос Йоргаллиcдан ишонч ёрлиқларини қабул қилди.

Суҳбат чоғида икки мамлакат ўртасидаги ҳамкорликни устувор йўналишларда янада ривожлантиришнинг асосий жиҳатлари муҳокама қилинди.

Кипрос Йоргаллис, шунингдек, 2022 йил июнидан бери Кипрнинг Россиядаги элчиси ҳисобланади.

Ўзбекистоннинг Сингапурдаги элчиси ўз вазифасига киришди

30 апрель куни Ўзбекистоннинг янги тайинланган элчиси Алишер Қаюмов Сингапур Президенти Тарману Шанмугаратнамга ишонч ёрлиқларини топширди.

Сингапур Президенти икки томонлама муносабатларни мустаҳкамлаш ва ривожлантириш борасидаги саъй-ҳаракатларга ўз ҳиссасини қўшишга тайёрлигини билдирди, шунингдек, Ўзбекистон раҳбарияти ва халқига энг эзгу тилакларини етказди.

Алишер Қаюмов Сингапурга март ойи ўрталарида келган эди. У Ўзбекистоннинг Сингапурдаги элчиси (2018—2024) ва Австралияда (2022—2024) ярим ставкада ишлаган элчиси сифатида Сингапурда аккредитациядан ўтган Қаҳрамон Шакиров ўрнига Сингапурдаги резиденцияни эгаллади.